Að kunna til verka

Bolli Valgarðsson skrifar um upplýsingagjöf

Fréttir í breskum fjölmiðlum af því að meira en 100 opinberar stofnanir, svo sem sveitarfélög, lögregluumdæmi, opinber samgöngufyrirtæki og fleiri aðilar þar í landi hefðu lagt peninga á íslenska bankareikninga og ef til vill tapað nærri tvö hundruð milljörðum íslenskra króna á ævintýrinu hefur leitt til þess að sveitarfélögin þar í landi hafa tekið upp samstarf á sviði almannatengsla og hagsmunagæslu. Er meginmarkmiðið með samstarfinu að halda almenningi og hagsmunaaðilum upplýstum um stöðu mála og ekki síst að leiðrétta sögusagnir sem ekki eiga við rök að styðjast. Slíkar fréttir eru einmitt fyrirferðarmiklar í umræðunni að sögn talsmanns Sambanda breskra sveitarfélaga (LGA). Þetta kemur fram í tímaritinu PR-Week, sem gefið er út í Bretlandi og dreift til áskrifenda um allan heim.

Á vegum sambands bresku sveitarfélaganna er nú að störfum fjölmennt teymi almannatengslaráðgjafa, sem annast samskipti við fjölmiðla (media relations) og hafa ráðgjafarnir sett saman sérstaka áætlun til að tryggja samhæfða upplýsingamiðlun allra hlutaðeigandi aðila. Einnig er að störfum annað teymi ráðgjafa á sviði opinberrar hagsmunagæslu (public affairs) og er hlutverk þess hóps að dreifa upplýsingum til ráðamanna, svo sem sveitarstjórnarmanna, þingmanna, þingnefnda og ráðuneyta. Markmiðið er að upplýsa um stöðu mála á hverjum tíma.

Upplýsingafulltrúi LGA, Richard Stokoe sagði nýlega í viðtali að á rúmum sólarhring (eftir að fréttir fóru að berast af fjárhagstjóni bresku sveitarfélaganna) hefðu nærri 100 manns hringt á LGA til að afla upplýsinga. Athyglisvert var að í langflestum tilvikum var kveikjan að samtölunum sögusagnir sem ekki áttu við rök að styðjast. Símtölin gáfu fjölmiðlateyminu því kærkomið tækifæri til að miðla til fjölmiðlanna réttum upplýsingum. Stokoe nefndi sem dæmi frétt í The Independent þar sem sagði af þúsundum opinberra starfsmanna sem fengju ekki lengur greidd laun vegna örlaga íslensku bankanna. Fréttin átti ekki við nein rök að styðjast og þrátt fyrir að ekki væri vitað hvaðan fréttin væri komin vildi LGA koma þeim skilaboðum á framfæri að allar fréttir væru teknar alvarlega og þeim svarað á ábyrgan hátt þannig að almenningur gæti treysti þeim upplýsingum sem viðkomandi yfirvöld hefðu fram að færa.

Þær stofnanir sem löskuðust af hruni bankanna starfrækja nú upplýsingadeildir til að annast samskipti við fjölmiðla og miðla jafnóðum réttum og faglegum upplýsingum til almennings í samræmi við leiðbeiningar frá LGA. Talsmaður Kent County sýslu, Jane Clark, segir að umfjöllun fjölmiðla sé nú að mestu leyti ábyrg og hrósar hún þeim fyrir að birta viðbrögð frá opinberum aðilum við fréttum sem ekki eiga við rök að styðjast.

Eru þessi faglegu vinnubrögð Bretanna ekki dæmi um það sem opinberir aðilar hér á landi gætu tileinkað sér í ríkari mæli en hingað til hefur tíðkast?

Höfundur er ráðgjafi í almannatengslum.