Dómur í skilnaðarmáli Heather og Paul verður birtur

Dómur í skilnaðarmáli Heather Mills og Pauls McCartneys verður gerður opinber. Heather vildi reyna að koma í veg fyrir að hann yrði birtur til að vernda einkalíf dóttur sinnar, en dómari úrskurðaði í dag að hún gæti ekki áfrýjað birtingunni.

Samkvæmt úrskurði dómarans í gær hlýtur Heather sem samsvarar 3,7 milljörðum króna í skilnaðarbætur. Það samsvarar um 2,6 milljónum króna fyrir hvern dag sem þau voru saman. Þá mun Paul borga rúmar fimm milljónir króna á mánuði fyrir framfærslu dóttur þeirra, Beatrice, auk þess að sjá um kostnað vegna barnfóstra og skólagöngu hennar.