Framkoma Birkis fyrir neðan allar hellur

Júlíus Þór Júlíusson, formaður Samtaka áhugafólks um spilafíkn, segir framkomu þingmannsins Birkis Jóns Jónssonar fyrir neðan allar hellur en Birkir Jón sagði á Vísi í gær að hann hygðist berjast fyrir lögleiðingu pókers.

Birkir Jón viðurkenndi að hafa spilað póker í spilavíti í miðbænum og gengið út með tugi þúsunda í gróða. Júlíus Þór segist vart hafa trúað sínum eigin eyrum þegar hann heyrði af fyrirætlunum Birkis Jóns.

"Að þessi maður skuli ætla að ganga fram fyrir skjöldu og upphefja fjárhættuspil sem hefur eyðilagt fjárhag fjölmargra fjölskyldna er fyrir neðan allar hellur. Hann ætti að taka sig saman í andlitinu og fara í naflaskoðun," segir Júlíus Þór.

Birkir Jón var bæði formaður fjárlaganefndar og aðstoðarmaður félagsmálaráðherra og Júlíus segir að honum ætti að vera vel ljóst hvers konar vandamál fylgja póker. "Ég hef mikið rætt við hann um þetta í gegnum tíðina og reynt að sækja styrk fyrir það starf sem við erum að vinna. Ég hef hins vegar mætt grjótvegg og nú skilur maður ástæðuna," segir Júlíus og telur það fráleitt að Birkir Jón hafi verið að spila póker upp á pening í fyrsta sinn.

„Menn labba ekki út með gróða í fyrsta og eina skiptið. Guð má vita hvað hann hefur tapað miklu í þessu fjárhættuspilavafstri sínu," segir Júlíus Þór og viðurkennir að hann hefur áhyggjur af siðferðiskennd þingmannsins.

„Ég mun senda honum bréf á næstunni og óska eftir skýringum á þessum málflutningi hjá honum. Svona lagað er síst til þess fallið að hjálpa okkur í baráttunni gegn spilafíkn og nógu erfið er hún fyrir," segir Júlíus.