Fjármálastjórinn endurgreiddi féð

Fyrrverandi fjármálastjóri Garðabæjar sem var uppvís í byrjun ágúst að hafa dregið sér 9,2 milljónir króna á nokkra mánaða tímibili hefur endurgreitt bæjarfélaginu féð. Maðurinn millifærði upphæðir úr bókhaldi bæjarins inn á eigin reikning.

Fjármálastjórinn sem lét strax af störfum gekkst við því að um óheimila ráðstöfun hafi verið að ræða og í framhaldinu undirritaði hann greiðslutryggingu til Garðabæjar.

,,Allt hefur verið endurgreitt og að okkar hálfu er málinu lokið," segir Gunnar Einarsson, bæjarstjóri í Garðabæ, og bætir við að málið hafi verið skoðað ofan í kjölinn og farið hafi verið yfir bókhald bæjarfélagsins.

Helgi Magnús Gunnarsson, saksóknari efnahagsbrotadeildar Ríkislögreglustjóra, segir að málið sé í rannsókn og óvíst sé hvenær henni ljúki.