Jankovic: Mikilvægasti leikur fyrri umferðar

Milan Stefán Jankovic, þjálfari Grindavíkur, sagði að sínir menn hefðu vitað að leikurinn gegn Fylki í kvöld myndi sennilega vera mikilvægasti leikur fyrri umferðar Landsbankadeildar karla.

„Það skipti okkur gríðarlega miklu máli að fá þessi þrjú stig í kvöld," sagði Jankovic í samtali við Vísi eftir sigur sinna manna á Fylki í kvöld, 1-0.

„Við sýndum í kvöld að við getum líka barist. Við vissum að Fylkismenn væru þreyttir eftir ferðalagið til Lettlands og þeir reyndu að láta okkur hlaupa meira í fyrri hálfleik. En svo gátu þeir ekki klárað sitt í þeim síðari."

Grindavík fær tvo skæða sóknarmenn inn í liðið sitt þegar félagaskiptaglugginn opnar um miðjan næsta mánuð og segir Jankovic að útlitið er bjart.

„Við vorum með þrjá menn á bekknum í dag sem voru í byrjunarliðinu í síðasta leik. Það er komin meiri samkeppni um stöður í liðinu og mun betri stemning, það er ekki spurning."