Pétur: Rökréttur sigur

Pétur Marteinsson átti skínandi góðan leik fyrir KR sem vann Fram, 2-0, á KR-vellinum í kvöld.

Pétur hefur átt við meiðsli að stríða og ekkert verið í leikmannahópi til þessa á tímabilinu. En hann kom inn í vörn liðsins í stað Gunnlaugs Jónssonar sem tók út leikbann og Pétur átti prýðisgóðan leik.

„Fyrir viku síðan leit ekki út fyrir að ég myndi spila hér í dag. Ég hef ekki æft með liðinu í einn og hálfan mánuð en það var ljómandi gott að fá tækifærið fyrst Gulli gat ekki spilað í dag," sagði Pétur í samtali við Vísi eftir leik.

„En ef ég á að vera heiðarlegur þarf ég að taka fram að ég er ekki orðinn 100 prósent klár. Ég þarf einhverja daga og vikur til að tjasla mér saman og koma mér í form."

Pétur vildi lítið segja um hvort að leikurinn í kvöld hafi verið hans besti síðan hann gekk til liðs við KR fyrir síðasta tímabil.

„Þegar illa gengur eru menn oft fljótir að gleyma góðu leikjunum og skella skuldinni á aðra. En ég vil ekki dvelja við fortíðina og vil frekar horfa fram á við. Ég vil koma mér í betra form og eiga þátt í góðu tímabili með KR."

Framarar spiluðu einnig vel í leiknum en KR-ingar áttu þó tvímælalaust sigurinn skilið. Hann er sá fyrsti síðan að KR vann Grindavík í fyrstu umferð mótsins. Spurður hvort að leikurinn hafi verið sá besti hjá KR til þessa í sumar segir Pétur að málið sé ekki svo einfalt.

„Mér fannst að mörgu leyti leikurinn á móti Grindavík vera allt í lagi miðað við að það var fyrsti leikur mótsins."

„Við erum svo með tögl og haldir á leiknum á móti Fjölni en töpum honum á síðustu mínútunni. Gegn Breiðablik áttum við ljómandi góðan síðari hálfleik og við byrjuðum mjög vel á móti FH. Sigurinn í kvöld var því rökrétt framhald á því sem hefur verið að gerast að undanförnu. Nú er vonandi að við höldum dampi og verðum bara betri og betri."

„Það verður líka að taka fram að veturinn hjá KR var öðruvísi en hjá flestum öðrum liðum," bætti Pétur við. „Við vorum meira og minna í hlaup- og styrktaræfingum og öðru þess háttar. Við vorum minnst af öllum öðrum liðum deildarinnar í fótbolta. Þannig að ég vona að við séum að ná í afturendann á hinum liðunum og siglum svo fram úr. Það er draumurinn."