Þriðja hvert hjónaband endar með skilnaði

Ríflega þriðja hvert hjónaband hér landi endar með skilnaði samkvæmt samantekt Hagstofunnar þar um.

Tölur Hagstofunnar sýna enn fremur að ríflega 1.700 pör gengu í það heilaga á síðasta ári. Auk þess staðfestu 19 pör samkynhneigðra samvist í fyrra, tíu pör karla og níu kvenna. Á sama tíma skráðu nærri 2.100 gagnkynhneigð pör sig í óvígða sambúð og 32 samkynhneigð pör sem er nokkuð minna en árið 2006 þegar pörin voru 52. Lögskilnaðir árið 2007 reyndust 515 og 603 pör skráðu sig úr sambúð.

Giftingartíðni fremur lág

Bent er á í frétt Hagstofunnar að líkt og annars staðar á Norðurlöndum sé giftingartíðni fremur lág hér á landi. Fjöldi hjónavígsla á hverja þúsund íbúa var 5,5 árið 2007 samanborið við 5,8 ári fyrr. Giftingartíðni lækkaði ört frá miðjum 8. áratugnum og náði sögulegu lágmarki árið 1990 en þá var giftingartíðni 4,5 af hverjum þúsund íbúum. Eftir það hækkaði giftingartíðnin og hefur verið á bilinu 5,2 til 5,8 frá síðustu aldamótum. Samkvæmt upplýsingum af hjónavígsluskýrslum bjuggu 85 prósent allra hjónaefna saman áður en þau festu ráð sitt.

Meðalgiftingaraldur reynist nú 34 ár hjá körlum og 32 ár hjá konum og hefur hækkað ört undanfarna áratugi. Meðalaldur við stofnun sambúðar er hins vegar rúm 29 ár meðal karla en 27 ár meðal kvenna.

Skilnaðartíðni stendur í stað

Hagstofan segir skilnaðartíðni mælda sem skilnaði á hverja þúsund íbúa gefa nokkuð misvísandi mynd af umfangi skilnaða. Því sé betra að horfa til uppsafnaðs skilnaðarhlutfalls, en þetta hlutfall mælir hversu mörg hjónabönd enda með skilnaði. Uppsafnað skilnaðarhlutfall var 34 prósent árið 2007 miðað við 35 prósent árið 2006. Alls staðar á Norðurlöndum er uppsafnað skilnaðarhlutfall hærra en hér, hæst í Svíþjóð en þar enda 55 prósent hjónabanda með skilnaði.