Munnlegur málflutningur í máli Saga Capital gegn Insolidum

Munnlegur málflutningur í gjaldþrotaskiptakröfu Saga Capital á hendur fyrirtækinu Insolidum fer fram á miðvikudaginn. Sýslumaður hefur gert árangurslausa kyrrsetningu í fyrirtækinu.

Nokkuð hefur verið fjallað um mál Saga Capital og Insolidum sem er félag í eigu Daggar Pálsdóttur varaþingmanns og hæstaréttarlögmanns og sonar hennar.

Insolidum keypti stofnfjárbréf í SPRON í gegnum Saga Capital í júlí á síðasta ári. Bréfin keypti félagið fyrir tæpar 600 milljónir og Saga Capital fjármagnaði 320 milljónir af því.

Eftir að gengi bréfanna í SPRON féll mikið á fyrstu mánuðum félagsins á markaði fór Saga Capital fram á svokallað veðkall, það er aukið tryggingafé vegna bréfanna. Í kjölfarið af því rifti Insolidum samningum við bankann á þeim forsendum að reglur hefðu verið brotnar í viðskiptum með bréfin.

Í kjölfarið fór Saga Capital fram á að fá öll hlutabréf í fyrirtækinu og yrði þar með réttmætur eigandi fyrirtækisins. Það mál fór fyrir Héraðsdóm og síðar Hæstarétt sem féllst ekki á þessa kröfu fjárfestingarbankans meðal annars vegna þess að Saga Capital taldist ekki hafa gert viðhlítandi grein fyrir því hvaða heimild gæti staðið til þess að bankanum yrðu fengin umráð félagsins.

Nú er hinsvegar annað mál farið af stað og fer munnlegur málflutningur í því fram á miðvikudaginn í næstu viku.