Guðmundur fær markið (myndband)

Guðmundur Steinarsson fær síðara mark sitt í leik Keflavíkur og KR skráð á sig en boltinn hafði viðkomu í varnarmanni KR á leið í markið.

Eins og sést á meðfylgjandi myndskeiði breytir boltinn mikið um stefnu á Skúla Jóni Friðgeirssyni, varnarmanni KR, og boltinn fer af honum í markið.

Jóhannes Valgeirsson, dómari leiksins, ákvað þó að skrá markið á Guðmund. „Við ræddum þetta aftur á bak og áfram og niðurstaðan var sú að Guðmundur skaut á markið. Þá er þetta ekki sjálfsmark," sagði Jóhannes í samtali við Vísi. „En þarna erum við vissulega á gráu svæði."

„Við skilgreinum þetta eftir því hvort að skotið sé á leiðinni á markið. Ef ekki telst það vera sjálfsmark."

„Ég gat þó ekki neglt þetta af eða á samkvæmt myndunum sem ég hafði. Mér fannst samt líklegra að skotið væri á markið og ákvað því að hafa það þannig."

Sjálfur sagðist Guðmundur aldrei vera í vafa um að hann fengi markið skráð á sig.

„Ef þetta var sjálfsmark þá hefur Frank Lampard ekki náð að skora eitt einasta mark fyrir Chelsea," sagði hann í léttum dúr. „Boltinn var allan tímann á leið á markið."

Guðmundur hefur skorað sex mörk í fyrstu sex umferðum mótsins og er markahæsti maður deildarinnar. „Það er ágætt meðaltal en það eru stigin sem telja. Maður fagnar hverju stigi sem kemur í hús og skiptir ekki öllu hver skorar mörkin."