Fréttamenn staðfesta aðgangshindranir yfirvalda á Skaga

Deilur Þórunnar Sveinbjarnardóttur og Blaðamannafélags Íslands vegna ísbjarnarmálsins á Hrauni á Skaga halda áfram. Nú fullyrðir formaður Blaðamannafélagsins, Arna Schram, að fréttamenn á staðnum staðfesti að yfirvöld hafi takmarkað aðgang þeirra að birninum eftir að hann var skotinn.

Í yfirlýsingu Örnu segir enn fremur að þessar staðreyndir sýni að ekkert mark sé takandi á yfirlýsingu umhverfisráðuneytisins sem send var fjölmiðlum í gær. Þar furðaði Þórunn Sveinbjarnardóttir umhverfisráðherra sig á því að Blaðamannafélagið hefði haldið því fram að aðgangur að dýrinu hefði verið takmarkaður. Þeir hafi fengið að mynda dýrið eftir að nauðsynlegir sýnatöku lauk.

„Ekkert hefur komið fram sem sýnir fram á nauðsyn þess að halda fréttamönnum frá, með lögregluvaldi, í rúmlega kílómetra fjarlægð á meðan sýnatökur úr dýrinu fóru fram. Aðgerðirnar fólu í sér ritskoðun sem gengur gegn tjáningarfrelsisákvæði stjórnarskrárinnar," segir Arna og bætir við: „Sjálfur umhverfisráðherra, Þórunn Sveinbjarnardóttir, staðfesti þetta í hádegisviðtali Stöðvar 2 í síðustu viku. Þar sagði hún að vilji hefði staðið til þess að tryggja með öllum ráðum að ekki yrðu sendar út myndir "sem gæfu kannski skilaboð sem við vildum alls ekki gefa við þessar aðstæður," eins og hún orðaði það."

Blaðamannafélagið ítrekar enn fremur mótmæli sín og hvetur ráðuneytið, Umhverfisstofnun og lögreglu til að leita leiða til að koma í veg fyrir að umræddar aðgerðir endurtaki sig.