Neikvæð viðbrögð frá Brussel við hugmynd Björns

Evrópunefndin hyggst fara yfir hugmyndir Björns Bjarnasonar, dómsmálaráðherra, um upptöku evru á grundvelli samningnum um hið evrópska efnhagssvæði. Nefndin fundaði í dag í fyrsta sinn frá því að Björn setti fram sínar hugmyndir.

Ágúst Ólafur Ágústsson, varaformaður Samfylkingarinnar og annar tveimur formönnum nefndarinnar, segir að hugmynd Björns hafi fengið neikvæð viðbrögð frá Brussel.

Björn setti fram þá hugmynd um miðjan júlí í sumar að reynt verði að taka upp evru á Íslandi á grundvelli EES en án aðildar að Evrópusambandinu.

,,Við erum að fá vísbendingar frá Brussel að menn taka ekki mjög undir þessa hugmynd en við munum að sjálfsögðu taka þetta upp gagnvart framkvæmdastjórum Evrópusambandsins þegar við förum þangað og síðan munum við leggja mat á þau svör sem við fáum," sagði Ágúst Ólafur í kvöldfréttum Ríkisútvarpsins. Evrópunefndin heimsækir Brussel í september.

,,Nefndin ákvað að kalla dómsmálaráðherra fyrir næsta fund til að ræða milliliðalaust við hann um þessi mál og hans hugmyndir."

Ágúst Ólafur segir að Evrópunefndin nálgist tillöguna út frá þremur sjónarhornum. Hagfræðilegum, lagalegum og pólitískum.

,,Það skiptir miklu máli í mínum huga að hafa ekki þessa leið hangandi fyrir okkur í marga mánuði. Nefndin var sammála þeirri nálgun að við verðum að fá einhvern botn í þessa athugun frekar fyrr en seinna," segir Ágúst Ólafur.