Arnór Atla: Ég er hundsvekktur

Arnór Atlason hefur átt frábæra Ólympíuleika. Skorað mörk, lagt upp fjölda þeirra og spilað fína vörn. Hann var enn að jafna sig eftir tapið þó svo hann væri kominn með verðlaunapening utan um hálsinn.

„Það eru blendnar tilfinningar. Ég er eiginlega hundsvekktur. Stundin eftir leikinn var hrikalega erfið og það mun taka tíma að jafna sig á þessu tapi. Enn þegar við lítum til baka eftir einhvern tíma þá mun maður minnast þessarar stundar sem ótrúlegrar. Ég held við séum búnir að gera okkur ódauðlega í íslenskri íþróttasögu," sagði Arnór og reyndi að brosa í kampinn.

„Ég er samt stoltur og stoltið á eftir að fylgja manni endalaust. Við erum loksins búnir að vinna bug á þessari medalíukrísu og vonandi opnar þetta afrek á eitthvað meira í framtíðinni."