Óvíst hvort Katrín fái að spila með gegn Írum

Ekki er fullvíst hvort að Katrín Ómarsdóttir fái leyfi hjá háskólaliði sínu í Bandaríkjunum til að koma til móts við íslenska landsliðsins í lok mánaðarins sem mætir Írum í umspili um laust sæti á EM í Finnlandi á næsta ári.

„Katrín hefur verið að ræða þetta mál við þjálfarann sinn og vonast ég auðvitað til að fá hana. Sérstaklega þar sem ljóst er að Dóra Stefánsdóttir verður í leikbanni í fyrri leiknum," sagði Sigurður Ragnar Eyjólfsson í samtali við Vísi.

„Háskólaboltinn í Bandaríkjunum heyrir ekki undir FIFA og ber þeim því engin skylda til að leyfa henni að taka þátt í þessum leikjum," bætti hann við. „En við eigum mikið af góðum miðjumönnum til að leysa hana af hólmi ef það kemur til þess."

Ísland mætir Írlandi í lok mánaðarins í umspili um laust sæti á EM í Finnlandi sem fer fram á næsta ári.