Bush reytti af sér brandarana á kvöldverði blaðamanna

George Bush Bandaríkjaforseti reytti af sér brandara á árlegum hátíðarkvöldverði blaðmanna í Hvíta húsinu á kostnað hugsanlegra eftirmanna sinna. Þetta var í síðasta sinn sem Bush ávarpar samkomuna en löng hefð er fyrir því að Bandaríkjaforseti heiðri samkomuna ásamt fína og fræga fólkinu í Bandaríkjunum.

Bush sagðist meðal annars hissa á því að John McCain, verðandi forsetaframbjóðandi repúblikana, og demókratarnir Hillary Clinton og Barack Obama væru á staðnum. Um McCain sagði Bush: ,,Hann hefur að líkindum viljað fjarlægjast mig," og vísaði þar til þess að Bush og McCain eru á öndverðum meiði í ýmsum málum.

Hillary komst ekki inn vegna leyniskyttnanna

Forsetinn skaut þó fastari skotum á demókratana tvo sem berjast nú um að verða forsetaefni. ,,Hillary Clinton komst ekki inn vegna leyniskyttnanna og Obama öldungardeildarþingmaður er í kirkju." Með því fyrrnefnda vísaði hann til þeirrar yfirlýsingar Clinton að hún hefði lent í árás leyniskyttna í heimsókn í Bosníu á tíunda áratugnum en sú fullyrðing reyndist ekki rétt. Með orðunum um Obama vísaði Bush til deilu sem staðið hefur um orð prests í söfnuði sem Obama tilheyrði, en repúblikanar hafa nýtt sér afdráttarlausar yfirlýsingar prestsins til árása á Obama.

Cheney að pakka saman dýflissunum

Bush mátti þó þola nokkrar háðsglósur sjálfur á kvöldverðinum frá Craig Ferguson, stjórnanda þáttarins The Late Late Show. Ferguson spurði Bush hvað hann hygðist taka sér fyrir hendur þegar forsetatíð hans lyki og lagði til að hann fyndi sér starf með fleiri frídögum. Bush hefur einmitt verið legið á hálsi fyrir að vera meira í fríi en forverar hans í embætti.

Þá fékk Dick Cheney einnig sinn skammt frá Ferguson. Hann sagði Cheney þegar farinn að skipuleggja brottflutning sinn úr húsnæði varaforseta. ,,Það tekur lengri tíma en margur heldur að pakka saman heilli dýflissu," sagði Ferguson.

Bush var ekki sá eini sem heiðraði blaðamenn með nærveru sinni því ekki ófrægari menn en rithöfundurinn Salman Rushdie og leikararnir Ben Affleck og Pamela Anderson voru einnig á staðnum.