Sverrir tekur við Fylki

Sverrir Sverrisson mun stýra Fylki út leiktíðina en þetta staðfesti hann í samtali við Vísi nú rétt í þessu.

Sverrir tekur við af Leifi Garðarssyni sem var sagt upp störfum sem þjálfari Fylkis í gær. Fylkir tapaði fyrir KR í fyrrakvöld, 2-0, og mætir Fjölni í undanúrslitum bikarkeppninnar á sunnudaginn.

„Mér líst mjög vel á verkefnið sem er framundan. Þetta verður spennandi og krefjandi en við erum bara að hugsa um að klára tímabilið eins vel og hægt er," sagði Sverrir.

Þetta er ekki í fyrsta sinn sem hann tekur við liðinu en hann stýrði Fylki í síðustu tveimur leikjunum leiktíðina 2005 eftir að Þorláki Árnasyni var sagt upp störfum. Síðar um haustið var svo Leifur ráðinn.

„Ég hef fylgst vel með öllum heimaleikjum Fylkis í sumar enda bý ég rétt hjá vellinum. Ég er enn harður Fylkismaður en það allra mikilvægasta nú er að tryggja liðinu áframhaldandi sæti í efstu deild. Það er fyrir öllu."

Sverrir lék með Fylki frá árunum 2000 til 2003 og þekkir vel til í herbúðum liðsins. Hann er bróðir Eyjólfs Sverrissonar fyrrum landsliðsþjálfara en hann segir að ekki hafi komið til greina nú að fá hann með sér í starfið.

Hann sagði að hann myndi gera breytingar á Fylkisliðinu fyrir næsta leik.

„Það verða breytingar, það er alveg öruggt. Hversu miklar er ekki ljóst en við munum taka einn leik fyrir í einu. Ég fæ reyndar ekki langan tíma til að undirbúa liðið fyrir næsta leik en eftir hann fáum við langt frá og þá mun okkur gefast tækifæri til að þjappa okkur saman."