Þórunn bikarmeistari í Brasilíu

Santos, lið Þórunnar Helgu Jónsdóttur, varð bikarmeistari í Brasilíu með því að vinna Sport Recife samtals 6-1 í tveimur úrslitaleikjum. Santos vann seinni leikinn í gærkvöldi 3-0 og lék Þórunn allan leikinn.

Þetta er í annað sinn á árinu sem Þórunn Helga verður bikarmeistari en hún vann bikarinn með KR hér á landi. Eftir tímabilið hélt hún síðan til Brasilíu og gekk til liðs við Santos.

„Þjálfarinn ræddi við mig óformlega um möguleika á að koma aftur eftir áramót og ég gæti alveg hugsað mér það. Þetta er frábær félagsskapur og fótboltinn góður, æfingarnar góðar og raunar ekki undan neinu að kvarta. Hins vegar eru mörg verkefni fram undan hjá íslenska landsliðinu og því mundi ég gjarnan vilja spila aðeins nær Íslandi til að eiga möguleika á að taka þátt í þeim," sagði Þórunn í viðtali við Fréttablaðið nýlega.