Ósáttir við góðærisgrín Plúsferða

Forsvarsmenn Hótel Holts hafa farið fram á það við ferðaskrifstofuna Plúsferðir að fyrirtækið taki úr birtingu auglýsingar sem þeir telja villandi.

Auglýsingastofan sem gerði auglýsingarnar féllst á þessu beiðni og bað forsvarsmenn Hótel Holts afsökunar á auglýsingunni.

Í henni ákveður hópur auðmanna að lenda þyrlunni sinni í sjoppunni Baulu í staðinn fyrir að fara á Holtið þar sem flugið sé orðið svo dýrt.

Auglýsingin er hluti af herferð sem gerir grín að því að góðærinu sé lokið.

En Friðgeir Ingi Eiríksson, sem sér um veitingarekstur á Hótel Holti, segir að menn þurfi ekki að vera neinir auðmenn vilji menn fara út að borða á Holtinu.

"Þvert á móti. Við bjóðum upp á afar viðráðanleg verð," segir Friðgeir.

Hann segir að undanfarnar vikur og mánuði hafi Hóltel Holt eytt töluverðum fjármunum í að kynna nýjan matseðil og lægri verð. Það sé því svekkjandi að slík herferð sé slegin út af borðinu með einni auglýsingu.

Hann segir jafnframt að auglýsing Plúsferða styrki þá ímynd sem lengi hafi verið við lýði að eingöngu efnafólk geti borðað á Holtinu.

"En við höfum unnið jafnt og þétt í því að breyta þessu undanfarið. Þess vegna þótti okkur leiðinlegt að fá þetta svona í bakið."

Friðgeir kveðst engu að síður ánægður með að orðið hafi verið við beiðni hans um að taka auglýsinguna úr birtingu.

Hann segist þó ekki fullviss um að málinu sé lokið.

"Við þurfum að meta það hvort við höfum orðið fyrir einhverjum skaða af þessum auglýsingum. Ef við teljum að svo sé gætu orðið eftirmál."