Tjáir sig ekki um hugsanlega lögsókn Guðmundar

Páll Magnússon, útvarpsstjóri, treysti sér ekki til þess að tjá sig um hugsanlega lögsókn Guðmundur Þóroddsson, fyrrverandi forstjóra Orkuveitunnar, á hendur Rúv. Hann segist ekki hafa séð fréttina þar sem Guðmundur var sakaður um að hafa tekið trúnaðargögn ófrjálsri hendi þegar hann hætti sem forstjóri og neitað að skila þeim.

Guðmundur hefur sagt gögnin sín eigin. Bíll sem hann var einnig sakaður um að vilja ekki skila sé hluti af ráðningarsamningi hans. Þetta kemur fram í yfirlýsingu frá Guðmundi.

"Ég hef ekki séð yfirlýsinguna eða fréttina. Ég treysti mér því ekki til að tjá mig um málið að svo stöddu," sagði Páll og benti á Elínu Hirst fréttastjóra.

Í yfirlýsingunni lýsir hann yfir furðu sinni á "einhliða fréttaflutningi Ríkissjónvarpsins" af þessu máli. "Engin tilraun var gerð til að bera efni fréttarinnar eða þær alvarlegu ásakanir sem þor komu fram undir þann sem hún þó fjallar um."

Jafnframt segir í yfirlýsingunni að slík vinnubrögð teljist fáheyrð "...og mun undirritaður í framhaldinu ræða við lögmenn sína um mögulega málssókn af þessum sökum, enda ber allt þetta ferli keim af því að vera sé að hanna tiltekna atburðarrás."

Ekki náðist í Elínu Hirst vegna málsins.