Lárus Orri leggur skóna á hilluna

Lárus Orri Sigurðsson hefur ákveðið að leggja skóna á hilluna og hætta að leika með Þór Akureyri. Lárus er 35 ára og á 42 landsleiki og tvö mörk að baki fyrir Ísland.

Lárus hóf feril sinn með Þórsurum en lék með Stoke City og West Bromwich Albion á Englandi. Hann var valinn leikmaður ársins hjá WBA tímabilið 1999.

„Það er svo margt, líkaminn er bara búinn, það er ekkert flóknara en það, ég hef verið ná einum og einum leik og svo er bara kominn tími til að aðrir taki við," sagði Lárus Orri í viðtali við Vikudag á Akureyri.

Lárus hefur síðustu ár verið spilandi þjálfari Þórsara í 1. deildinni og var búinn að leika níu leiki með liðinu í deild og bikar á þessu tímabili. Hann mun nú alfarið einbeita sér að þjálfun Þórs sem situr í 9. sæti 1. deildar.