Sigrún Brá bætti eigið Íslandsmet

Sigrún Brá Sverrisdóttir, Fjölni, bætti í dag Íslandsmet sitt í 200 metra skriðsundi á aldursflokkameistaramóti Íslands í Reykjanesbæ.

Hún synti á 2:01,55 mínútum og bætti gamla metið sem hún setti í nóvember í fyrra um þrjá hundraðshluta úr sekúndu.

Þá setti stúlknasveit SH unglingamet í 4x50 metra skriðsundi er hún synti á 1:49,25 mínútum. Sveitin bætti gamla metið um rúmar tvær sekúndur en hana skipa Hrafnhildur Lúthersdóttir, Berglind Friðriksdóttir, Hildur Erla Gísladóttir og Snjólaug Tinna Hansdóttir.