Ólafur tekur eitt tímabil til með Fylki

Ólafur Ingi Stígsson er hættur við að hætta og býst fastlega við því að leika með Fylki á næsta tímabili í efstu deild karla í fótbolta.

Ólafur hefur verið fyrirliði Fylkis undanfarin misseri en síðustu ár hefur hann átt við þrálát hnémeiðsli að stríða. Var það ástæðan fyrir því að hann ætlaði að hætta strax í haust en hann er 33 ára gamall.

„Ég fann að það var mjög erfitt að ætla að hætta í haust," sagði Ólafur. „En ég fann lítið til vegna meiðslanna á síðasta tímabili og það er ástæðan fyrir því að ég treysti mér til að taka eitt tímabil til viðbót. Það lítur út fyrir í dag að það verði mitt síðasta tímabil en maður ætti aldrei að segja aldrei."

Ólafur á þó enn eftir að skrifa undir nýjan samning við Fylki en núverandi samningur rennur út um áramótin. „Ég býst við því að fara í viðræður á næstunni og á ekki von á spila með öðru liði en Fylki á næsta tímabili."

Ólafur er uppalinn Fylkismaður en lék um tíma með Val sem og Molde í Noregi. Hann á að baki 145 leiki í efstu deild og hefur hann skorað í þeim tíu mörk. Hann á einnig níu A-landsleiki að baki.