Veigar búinn að skrifa undir

Landsliðsmaðurinn Veigar Páll Gunnarsson er búinn að skrifa undir þriggja og hálfsárs samning við franska liðið Nancy.

Þetta staðfesti umboðsmaður hans í samtali við TV2 í Noregi en Veigar stóðst læknisskoðun hjá félaginu í kvöld.

Veigar fer nú í jólafrí en heldur svo utan til móts við félaga sína eftir áramótin.

Veigar varð norskur meistari með Stabæk í Noregi í haust og átti stóran þátt í góðu gengi liðsins.

Í frétt TV2 er enda talað um að þarna hafi norsku meistararnir þurft að sjá á eftir einum af sínum allra bestu leikmönnum.

Því var haldið fram að Stabæk fengi allt að 15 milljónir norskra króna fyrir Veigar Pál, en Lars Bohinen yfirmaður íþróttamála hjá félaginu segir upphæðina ekki svo háa - þó hún sé ekki langt frá því.