Þjálfunin kitlar Arnar og Bjarka

Bjarki Gunnlaugsson sagði við Stöð 2 að hann og Arnar bróðir hans hafi sofið á tilboði HK-inga í nótt. Kópavogsliðið reyndi að fá tvíburana til að taka við þjálfun liðsins en þeir ákváðu á endanum að halda áfram að spila með FH.

Bjarki sagði að FH-ingar hefðu ekki staðið í vegi fyrir þeim ef þeir hefðu tekið tilboði HK um að gerast spilandi þjálfarar liðsins. Það kitlar þá bræður að taka að sér þjálfun í framtíðinni en þeir nutu þess stutta tíma sem þeir voru við stjórnvölinn hjá ÍA árið 2006.

HK hefur rætt við Ólaf Þórðarson og Lúkas Kostic um að taka að sér þjálfun liðsins. Sá síðarnefndi segir það mikinn heiður að HK hafði samband en hann vill þó ekki taka starfið að sér heldur ætlar að halda áfram að einbeita sér að vinnu sinni fyrir KSÍ.