Virðingarverð hugmynd hjá Helga

Hugmynd Helga Hjörvar um að selja Kárahnjúkavirkjun og fleiri virkjanir í eigu hins opinbera er virðingaverð að mati Friðriks Sophussonar, forstjóra Landsvirkjunar.

Á tímum tvísýnu í efnahagsmálum ríður á að Íslendingar séu vel búnir, segir Helgi Hjörvar þingmaður Samfylkingarinnar í grein í Morgunblaðinu í dag og leggur til að Kárahnjúkavirkjun og fleiri virkjanir í eigu hins opinbera verði seldar einkaaðilum. Ekki væri um varanlegt framsal að ræða heldur yrði rekstur Kárahnjúka seldur á leigu með samningum við Alcoa til 40 ára og aðrar virkjanir til 20 til 30 ára, eftir atvikum. Þá fengi ríkið þær að nýju til rekstrar.

Landsvirkjun ræki eftir sem áður nægilega margar virkjanir til að framleiða fyrir fólk og fyrirtæki í landinu, önnur en stóriðju.

Til að ná pólitískri sátt um málið sér Helgi fyrir sér að stofnaður verði auðlindasjóður handa komandi kynslóðum sem svipi til olíusjóðar Norðmanna. Og Helgi sér fyrir sér að sjóðurinn gæti oðið mikilvægur hluti þeirrar heildarmyndar af íslensku efnahagslífi sem sé til þess fallinn að skapa traust og trúverðugleika.

Í samtali við fréttastofu sagði Friðrik Sophusson forstjóri Landsvirkjunar að vissulega væri það virðingavert að alþingismaður velti fyrir sér hver sóknarfærin væru. Það væri hins vegar ekki verkefni Landsvirkjunar að fjalla um þessi mál heldur eigandans, ekki síst í kjölfar lagabreytinga sem urðu í vor og breyttu rekstrargrundvelli orkufyrirtækjanna.

Þar vísar Friðrik í þær breytingar þegar fyrirtækjum í opinberri eigu var gert ókleift að láta frá sér auðlindina, eins og vatnsréttindi. Þess má geta að fordæmi eru fyrir þeirri leið sem Helgi stingur upp, meðal annars í Noregi, en hún hefur ekki gefist vel, að sögn forstjóra Landsvirkjunar.