Grindavík með félagaskiptamál til FIFA

Landsbankadeildarlið Grindavíkur hefur skotið félagaskiptamáli til Alþjóða knattspyrnusambandsins vegna sóknarmannsins Gilles Mbang Ondo frá Gabon.

Ondo kom til landsins fyrir tíu dögum síðan og hefur æft með Grindvíkingum síðan þá. Þeir vilja semja við hann en hafa ekki fengið félagaskiptabeiðni sína samþykkta hjá gamla félaginu hans.

Ondo lék síðast með SC Eisenstadt í Austurríki sem var tekið til gjaldþrotaskipta í byrjun mánaðarins. Ingvar Guðjónsson, framkvæmdarstjóri knattspyrnudeildar Grindavíkur, sagði í samtali við Vísi að skiptastjóri þrotabúsins neitaði að samþykkja félagaskiptin.

„Austurríska knattspyrnusambandið hefur dregið lappirnar í þessu máli og er málið núna komið á borð FIFA. Það er okkar von að þeir taki á þessu máli bæði varðandi rétt leikmannsins og rétt okkar."

Það gæti flækt málin að félagaskiptaglugginn hér á landi lokar á miðnætti annað kvöld en Ingvar vonast til þess að það hafi ekki áhrif á málið.

„Félagaskiptabeiðnin fór frá okkur fyrir tólf dögum síðan og ef FIFA dæmir okkur í hag get ég ekki ímyndað mér annað en að hann fái leikheimild með okkur. En þetta er sérstakt mál og gæti gefið fordæmi."

Ondo er 23 ára gamall og lék áður með Auxerre í Frakklandi. Hann á að baki tvo A-landsleiki með Gabon og hefur skorað í þeim eitt mark. Hann er einnig með franskan ríkisborgararétt. 

SC Eisenstadt var stofnað árið 1907 og lék síðast í þriðju efstu deild í Austurríki. Félagið náði sínum besta árangri árið 1985 er það hafnaði í áttunda sæti í efstu deild þar í landi.