FCK í ágætri stöðu

Þýska liðið Nordhorn og FC Kaupmannahöfn frá Danmörku léku fyrri leik sinn í úrslitum EHF-bikarkeppninnar í dag. Nordhorn lék á heimavelli í dag og vann fjögurra marka sigur, 31-27.

Staðan var jöfn í hálfleik, 15-15, en síðari leikur liðanna fer fram í Kaupmannahöfn um næstu helgi.

Arnór Atlason lék með FCK í dag og skoraði eitt mark.

Þá fór fyrri leikur Veszprem og Rhein-Neckar Löwen fram í dag í úrslitum Evrópukeppni bikarhafa en leikið var í Ungverjalandi. Heimamenn í Veszprem höfðu sigur, 37-32, eftir að staðan var jöfn í hálfleik, 20-20.

Liðin mætast að nýju í Þýskalandi um næstu helgi.