„Eitt­hvað sem maður verður að læra af honum“

„Maður vonast alltaf til þess, svo þegar leið á tímabilið töpuðum við bara einum leik og þá var maður búinn að búa til væntingar. Við spiluðum vel á móti Magdeburg sem er mjög gott próf til að sjá hvernig liðið stendur. Eftir þann leik þá hugsaði maður að við eigum séns á að vinna Meistaradeildina og við náðum því, sem er geggjað.“

Viktor Gísli hefur komið sér vel fyrir í Barcelona þar sem mikið líf er í borginni. Í mörgum handboltabæjum er lítið um að vera og því er hann feginn að búa í Barcelona.

„Það er gott að kærastan mín hafi eitthvað að gera. Það er ekki mikið af handboltabæjum með mikið félagslíf og mikið um að vera. Hún er mjög ánægð með það sem gerir líf mitt léttara.“

Samherji Viktors Gísla í marki Barcelona er Emil Nielsen sem er af mörgum talinn besti markmaður heims. Hann var valinn mikilvægasti leikmaður Meistaradeildar Evrópu og gott að eiga góðan liðsfélaga sem maður getur lært mikið af.

„Við vorum herbergisfélagar og tölum báðir dönsku þannig að við urðum góðir félagar. Ég lærði mikið af því að horfa á hann á hverjum degi og sérstaklega hvernig hann nær að kveikja á sér í hverjum einasta leik. Það voru kannski tveir leikir á öllu tímabilinu þar sem hann var ekki alveg upp á sitt besta en í stóru leikjunum stóð hann sig alltaf vel og það er eitthvað sem maður verður að læra af honum.“

Það getur verið erfitt að deila markmannsstöðunni með besta markmanni heims og hefur Viktor Gísli fengið að kynnast því.

„Ég var einu sinni að hita upp og hélt að ég væri að fara að koma inn á. Þá varði Nielsen þrjú skot í röð og ég þurfti bara að setjast aftur niður.“