Árni sækist ekki eftir forstjórastöðunni

Árni Mathiesen, fjármálaráðherra, sækist ekki eftir því að verða næsti forstjóri Landsvirkjunar en undanfarið hefur hann verið orðaður við stöðuna.

Staðan var auglýst til umsóknar í byrjun september en Friðrik Sophusson hefur ákveðið að láta af störfum sem forstjóri fyrirtækisins. Umsóknarfresturinn var nýverið framlengdur og rennur hann út á föstudaginn.

,,Ég hef ekki sóst eftir því og ég á ekki vona á því að mér verði boðinn staðan," sagði Árni í Kastljósþætti á Rúv fyrr í kvöld þegar hann var spurður af því hvort hann væri að hætta í stjórnmálum til að geta tekið við forstjórastöðu Landsvirkjunar. Hann sagði umræðuna um allt annað vera uppspuna.

Þá sagðist Árni ekki vita til þess að hann væri að hætta sem ráðherra.