Palestínsk flóttakona segir ástandið í Al-Waleed búðunum skelfilegt

29 palestínskir flóttamenn eru væntanlegir til Íslands frá Al-Waleed flóttamannabúðunum á landamærum Íraks og Sýrlands. Á fréttavef Reuters er grein um þessar búðir og viðtal við Wedad, 30 ára gamla ekkju sem er á leið hingað til lands. Hún segir ástandið í búðunum skelfilegt og mjög erfitt fyrir börn sín.

Í greininni kemur fram að 2700 Palestínumenn eru strandaglópar í tveimur flóttamannabúðunum Al Waleed og Al Tanf við skelfilegar aðstæður.

Al Waleed-búðirnar eru staðsettar í eyðimörk og er hitastigið oft yfir 50 stig á sumrin en fyrir neðan frostmark á veturna. 400 kílómetrar eru í næsta sjúkrahús. Flóttamönnunum er ekki leyft að fara inn í Sýrland sem nú þegar er yfirfullt af flóttamönnum frá Palestínu og Írak.

Þeir flóttamenn sem eru á leið hingað til lands eru meðal þeirra sem hafa orðið hvað verst úti, oft og tíðum er um að ræða ekkjur með börn sín eins og í tilfelli Wedad.

Wedad kom í Al-Waleed búðirnar fyrir nokkrum mánuðum eftir að eiginmaður hennar lést í sjálfsmorðsárás í Írak. Hafði hann verið að hjálpa fórnalömbum sjálfsmorðssprengingar þegar önnur sprengja sprakk. Fjögurra ára gamall sonur þeirra særðist einnig í sprengingunni. Wedad yfirgaf Bagdad í kjölfarið til þess að komast til annarra landa en strandaði í búðunum.

Flóttamannastofnun Sameinuðu Þjóðanna hefur ítrekað reynt að vekja athygli á lífi palestínsku flóttamannanna á landamærunum en fengið lítil viðbrögð. Stofnunin skorar á lönd heimsins að taka við palestínsku flóttamönnunum og þá sérstaklega þeim sem þurfa tafarlausa aðhlynningu.

Talið er að 34 þúsund Palestínumenn hafi búið í Írak árið 2003 en nú er aðeins 10-15 þúsund eftir, þar af þessir 2700 í flóttamannabúðunum.