Whoopi Goldberg hætt að leika

Leikkonan Whoopi Goldberg er hætt að leika í kvikmyndum og ætlar framvegis að einbeita sér að sjónvarpi. „Það er ekki pláss fyrir mig í Hollywood lengur. Það eru yngri og glæsilegri leikkonur sem fá öll hlutverkin," segir hún í samtali við spjallþáttarstjórnandann Larry King. „Handritin berast ekki inn um lúguna hjá mér lengur og af þeim sökum verð ég að snúa mér að öðru."

Hin 52 ára Goldberg hefur leikið í meira en fjörtíu myndum á ferlinum og hlaut Óskarsverðlaunin fyrir leik sinn í Ghost. Í síðasta mánuði tók hún við stjórn sjónvarpsþáttarins The Wiew af Rosie O'Donnell.