U17 landslið kvenna vann stórsigur

Stelpurnar í U17 kvenna byrjuðu riðlakeppni Evrópumótsins af miklum krafti og lögðu Letta örugglega í fyrsta leik sínum. Lokatölur urðu 7-1 eftir að staðan í hálfleik hafði verið 5-0. Berglind Björg Þorvaldsdóttir gerði fimm mörk í leiknum.

Ferðalag stelpnanna til Slóveníu gekk ekki þrautalaust fyrir sig og vegna seinkunar á flugi komu stelpurnar ekki á áfangastað fyrr en kl. 4 í morgun. Ekki tók betra við þar sem að töskur hópsins skiluðu sér alls ekki á réttan stað. Stelpurnar slepptu því æfingu í morgun en mættu einbeittar í leikinn, reyndar í lánsbúningum. Sem betur fer var forsjálnin með í för og voru því allir leikmenn með skó og legghlífar í handfarangri.

Íslenska liðið stjórnaði leiknum frá upphafi til enda og strax á þriðju mínútu kom fyrsta markið og þar var Berglind Björg Þorvaldsdóttir á ferðinni. Sex mínútum síðar bætti Sigrún Inga Ólafsdóttir marki við og á 18. mínútu skoraði Berglind sitt annað mark í leiknum. Berglind bætti svo þriðja marki sínu við á 31. mínútu og þremur mínútum síðar skoraði, fyrirliðinn, Dagný Brynjarsdóttir fimmta mark Íslendinga. Frábær fyrri hálfleikur að baki og í hálfleik fréttist að langflestar töskurnar væru komnar á áfangastað.

Seinni hálfleikur var öllu rólegri en íslenska liðið með yfirhöndina. Mörkin létu á sér standa en það var svo títtnefnd Berglind Björg Þorvaldsdóttir sem að bætti við tveimur mörkum á 71. og 79. mínútu leiksins. Berglind gerði því fimm mörk í leiknum sem er ótrúlegur árangur. Þessi Eyjastelpa, sem leikur með Breiðablik, á ekki langt að sækja markheppnina en bróðir hennar er landsliðsmaðurinn Gunnar Heiðar Þorvaldsson. Lettar skoruðu sitt eina mark í blálokin úr vítaspyrnu en það skyggði ekki á góðan sigur íslensku stelpnanna.

Stelpurnar leiks svo gegn gestgjöfunum frá Slóveníu á miðvikudaginn og hefst leikurinn kl. 14:30 en Slóvenía og Úkraína gerðu jafntefli í dag, 2-2.

Af vefsíðu KSÍ