Nýtt leikkerfi prófað gegn Kanada

Ísland og Kanada mætast annað kvöld í vináttulandsleik á Laugardalsvelli en þetta er í fyrsta sinn sem liðin munu mætast í knattspyrnuleik. Ísland er í 107. sæti á styrkleikalista FIFA en Kanada í 52. sæti.

Eyjólfur Sverrisson, landsliðsþjálfari, er að undirbúa liðið fyrir komandi verkefni í undankeppni EM. „Þetta er undirbúningur fyrir ný verkefni, við erum að prófa nýja leikaðferð og gefa mönnum tækifæri til að sanna sig," sagði Eyjólfur í viðtali í fréttum Stöðvar tvö í kvöld.

„Við munum verjast í 4-5-1 og ætlum síðan að vera fljótir að snúa vörn í sókn og sækja í 4-3-3. Við erum búnir að vera að fara yfir það," sagði Eyjólfur.

Leikurinn fer fram klukkan 18:05 á miðvikudagskvöld.