Undanúrslit VISA-bikars kvenna í kvöld

Í kvöld fara fram undanúrslit VISA-bikars kvenna og hefjast báðir leikir kvöldsins kl. 18:00. Á Kópavogsvelli er stórleikur milli Breiðabliks og KR en í Keflavík taka heimastúlkur á móti Fjölni.

Blikastúlkur lögðu Val að velli í síðustu umferð keppninnar en ljóst er að þær eiga erfitt verkefni fyrir höndum gegn KR. Vesturbæjarliðið hefur haft yfirburði í leiki þessara liða í deildinni í sumar. Breiðablik hefur unnið bikarinn í níu skipti en KR tvisvar.

Keflavík og Fjölnir hafa aldrei unnið bikarmeistaratitilinn en Keflavík hefur einu sinni leikið til úrslita, árið 1991. Eftir gott gengi fyrri hluta sumars hefur ekki gengið nægilega vel hjá Fjölnisstúlkum að undanförnu en þær unnu þó 1-0 sigur þegar þessi tvö lið mættust síðast, snemma í júlímánuði.