Háskóli Íslands kemur best út í stjórnsýsluúttekt á íslenskum háskólum

Háskóli Íslands kemur bestu út í stjórnsýsluúttekt Ríkisendurskoðunar á kostnaði, skilvirkni og gæði kennslu. Úttektin náði til fjögurra íslenskra háskóla en næst best var útkoman hjá Háskólanum í Reykjavík. Ríkisendurskoðun telur mikilvægt að stjórnvöld taki skýrari afstöðu til þess hvernig verja á kennsluframlögum til háskóla.

Fjórir íslenskir háskólar komu til skoðunar í úttekt Ríkisendurskoðunar. Háskóli Íslands, Háskólinn í Reykjavík, Háskólinn á Akureyri og Háskólinn á Bifröst. Borin var saman kennsla í viðskiptafræði, lögfræði og tölvunarfræði á tímabilinu 2003 til 2005.

Háskóli Íslands kom best út og var efstur í níu af þeim ellefu atriðum sem horft var til. Háskólinn í Reykjavík kom næst best út en almennt ráku Háskólinn á Akureyri og Háskólinn á Bifröst lestina.

Vantar fleiri fasta akademíska starfsmenn

Samanburður Ríkisendurskoðunar leiddi í ljós að íslensku viðskiptadeildirnar stóðu þeim erlendur að baki þegar horft var til akademískrar stöðu og skilvirkni. Í því vó þyngst að erlendu skólarnir hafa hlutfallslega fleiri fasta akademíska starfsmenn með doktorsgráðu og útskrifa fleiri nemendur miðað við starfsmannafjölda.

Vantar skýra afstöðu

Þá er vakin athygli á miklum vexti viðskiptafræði og lögfræði hér á landi í skýrslu Ríkisendurskoðunar en nú stunda hlutfallslega mun fleiri nám í viðskiptafræði hér en annars staðar á Norðurlöndunum. Að mati Ríkisendurskoðunar þykir þetta endurspegla þá staðreynd að stjórnvöld hafi ekki reynt að stýra nemendafjölda einstakra háskólagreina með beinum hætti. Því þurfa stjórnvöld að taka skýrari afstöðu til þess hvernig verja á fjárveitingum til háskóla og taka meðal annars mið af þjóðhagslegri hagkvæmni einstakra námsgreina, kostnaði við þær, eðlilegum nemendafjöld og dreifingu kennslu milli skóla. Er meðal annars bent á að Háskóli Íslands var að jafnaði tvisvar til þrisvar sinnum ódýrari en sá skóli sem var dýrastur.

Þarf að draga úr brottfalli nemenda

Ennfremur kemur fram í skýrslu Ríkisendurskoðunar að brottfall nemenda úr námi var almennt mun meira hjá ríkisreknu háskólunum en þeim einkareknu. Þurfa stjórnvöld að leita leiða til að draga úr þessu brottfalli svo fjármagn nýtist sem best. Er í því samhengi að mati Ríkisendurskoðunar eðlilegt að huga að því hvort takmarka eigi inntöku nemenda frekar.