Alþingi sett

Ólafur Ragnar Grímsson, forseti Íslands, rifjaði upp í þinsetningarræðu sinni í dag að herstöðvarmálið hefði gufað upp á liðnum vetri en þar hefði verið átakamál sem klofið hefði þjóðina í áratugi. Ennfremur sagði hann að það sýndi styrk lýðræðisins hvernig fjölmiðlaflóran hefði gefið stjórnmálamönnum fjölþætt tækifæri til að koma boðskap sínum til skila í kosningabaráttunni. Þetta væri framför frá tímum flokksmálgagna.

Þingsetningin hófst í dag með messu í Dómkirkjunni samkæmt hefð. Á meðan þingmenn hlýddu á messu stilltu stilltu lögreglumenn sér upp í heiðursvörð fyrir framan þinghúsið. Að messu lokinni gengu þingmenn og ráðherrar yfir í þinghúsið og heiðursverðirnir heilsuðu með því að bera hönd að húfuskyggni.

Fyrir hádegi hittust þingflokkar stjórnarflokkana og ákváðu skipan í þingnefndir. Formaður fjárlaganefndar verður Samfylkingarmaðurinn Gunnar Svavarsson og Sjálfstæðismaðurinn Bjarni Benediktsson formaður utanríkismálanefndar. Formennska í öðrum nefndum fylgja þeim flokki sem fer með málaflokkinn í ríkisstjórn:

Samfylking hefur þessa nefndarformenn: Ágúst Ólafur Ágústsson í viðskiptanefnd, Katrín Júlíusdóttir í iðnaðarnefnd, Helgi Hjörvar í umhverfisnefnd, Guðbjartur Hannesson í félagsmála- og trygginganefndar og Steinunn Valdís Óskarsdóttir verður formaður samgöngunefndar.

Nefndarformenn Sjálfstæðisflokksins eru Birgir Ármannsson í allsherjarnefnd, Sigurður Kári Kristjánsson í menntamálanefnd, Pétur Blöndal verður yfir efnahagsnefnd , Ásta Möller yfir heilbrigðisnefnd og Arnbjörg Sveinsdóttir landbúnaðar- og sjávarútvegsnefnd.

En við þingsetninguna flutti Ólafur Ragnar Grímsson, Forseti ávarp og óskaði þingmönnum velfarnaðar í ábyrgðarstarfi sínu. Hann minnti þingmenn á að ríkisstjórnir kæmu og færu og þrátt fyrir ágreining, oft djúpstæðan og langvarandi, færi yfirleitt svo að nánast allir yrðu að vinna með öllum fyrr eða síðar. Sagði forseti svo: "Mikilvægt er að þingheimur allur kappkosti jafnan að ólík afstaða til deilumála fari ekki svo úr böndum að þjóðin lamist vegna deilna og nái ekki að nýta dýrmætan samtakamátt. Við höfum á liðnum vetri orðið vitni að því að ágreiningur sem klauf þjóðina í áratugi gufaði upp og í staðinn kom víðtæk samvinna við að breyta gamalli herstöð í háskólabyggð, nýta herskála fyrir námsmennina, gera vopnabúr að vísindastöð."

Forsetinn sagði meðal annars að nýliðnar kosningar hefðu verið vitnisburður um hversu lýðræðishefðin væri áfram sterk á Íslandi: "Þátttakan einstök sem fyrr; Ísland í sérflokki hvað það snertir en víða á Vesturlöndum eru merki um hnignun í því efni. Að auki veitti nú fjölmiðlaflóran öllum flokkum fjölþætt tækifæri til að koma boðskap til skila. Hin margradda umræða í sérhverjum miðli er ótvíræð framför frá fyrri árum þegar flokksmálgögnin þrengdu að og umræðuþættir í ljósvakamiðlum voru fáir."

Við lok athafnarinnar risu þigmenn úr sætum og hylltu forseta og fósturjörð með ferfölldu húrrahrópi.