Fortíðarhyggja eða framtíðarsýn

- Lífsgæði og fjölbreytt atvinna fyrir alla

Náttúra Íslands er ekki á útsölu. Það er furðuleg framtíðarsýn að vilja að Íslandi verði ruslahaugur fyrir önnur iðnríki sem hafa löngu horfið frá stóriðjustefnu. Í samkeppni við fátæk þróunarlönd, með því að bjóða orku á útsölu.

Að eiga þá ósk heitasta að virkja hvern einasta læk og hver í þágu erlendrar mengandi stóriðju, sem hvorki greiðir skatta af arði á Íslandi né rétt verð fyrir orkuna. Íslensk náttúra er meira virði en nokkur álbræðsla. Fórnum ekki einstakri náttúru fyrir stundarhagsmuni. Ísland er meira virði.

Stóriðja, konur og önnur störf

Ef 1% landsmanna vinna við stóriðju eru 99% að gera eitthvað annað! Við viljum öflugt atvinnulíf sem byggir á frumkvæði fólksins og einstaklingsframtaki. Öll fyrirtæki hafa byrjað á hugmynd. Það er hlutverk stjórnvalda að styðja við bakið á frumkvöðlum og litlum fyrirtækjum með góðu rekstarumhverfi. Sóknarfærin blasa við á öllum sviðum og með ívilnandi skattkerfi má hvetja fyrirtæki til að starfa á landsbyggðinni.

Víða um land er atvinnuleysi mest meðal kvenna. Það vantar fjölbreytt störf fyrir þær en þau eru ekki í stóriðju heldur við vaxandi ferðaþjónustu, í heilsulindum vegna vaxandi velmegunarsjúkdóma, háskóla og hátækniiðnaði og smáum nýsköpunar- og þróunarfyrirtækjum.

Ríkið græðir á kostnað fólksins

Skatttekjur ríkisins hafa stóraukist en þeim var ekki varið í fleiri hjúkrunarrými eða bættar samgöngum. Meðan skuldir ríkissjóðs hafa verið greiddar niður hafa skuldir heimilanna margfaldast. Þensla ríkisins hefur étið afganginn í einkavinavæðingu, ótal nefndum um ekkert og pólitískum ráðningum. Þessu viljum við breyta.

Skuldir heimilanna og refsing hins opinbera.

Það eru lítil lífsgæði að óttast gluggapóst. Þess vegna á að hækka skattleysismörk í 140 þúsund og lækka tekjuskatta á einstaklinga. Við treystum fólkinu til að axla ábyrgð, nota auknar tekjur til að greiða niður skuldir heimilanna.

Aldraðir og öryrkjar eru líka einstaklingar, afnám tekjutenginga og hækkun skattleysismarka bætir hag þeirra mikið. Við leggjum áherslu á að draga úr forræðishyggju og hætta að hegna fólki fyrir fyrirhyggju með því að skerða lífeyri vilji fólk nýta sparifé sitt á efri árum.

Fyrirmyndar Ísland

Við viljum réttlát og sanngjarnt samfélag, þar sem einstaklingarnir fá notið sín, mennta- og velferðarkerfi er fyrir alla og náttúran óspillt.

Kjósum fyrir framtíðina, kjósum Íslandshreyfinguna.

Ásta Þorleifsdóttir jarðfræðingur skipar 1.sæti á lista Íslandshreyfingarinnar í Suðurkjördæmi