Velferðarsamfélag - Nýir tímar

Að baki er kjörtímabil mikils óstöðugleika, þenslu og verðbólgu í efnahagsmálum. Ekki var staðið á bremsunum vegna gríðarlegra framkvæmda á Austurlandi , heldur keyrt áfram af fyrirhyggjuleysi.

Ríkisstjórnin hefur því gert sig seka um hagstjórnarmistök. Þau hafa rýrt kjör fólksins í landinu og aukið á skuldir heimilanna um 38,5 milljarða.

Greiðslubyrði hvers heimilis hefur hækkað að meðaltali um um 510 þúsund krónur, skv. hagfræðingi ASI. Og áfram hækkar lánin okkar vegna verðbólgu og hárra vaxta.

Ríkisstjórnin hefur líka vanrækt margvíslega félagslega þjónustu eins og marg oft hefur komið fram. Biðraðir hafa myndast fyrir börn og unglinga með geðraskanir, yfirfull geðdeildin á LSP , ungt fólk með fíkniefnavanda og skortur á hjúkrunarrými handa eldri borgurum.

Tekjurýrnun eldri borgara og fullur skattur á lífeyrisgreiðslur þeirra er þjóðarskömm um leið og Sjálfstæðisflokkurinn hleður undir þá ríku með 10% skatt á fjármagnstekjur.

Tryggingarstofnun hefur ekki fylgt almennri launaþróun og lífeyrisþegar hafa dregist aftur úr í kjörum. 60% aldraðra eru með tekjur undir 140 þúsund á mánuði (fyrir skatta). Um 4000 manns er undir fátæktarmörkum og 5300 börn í landinu búa við fátækt.

Mál er að linni. Í Samfylkingunni er metnaðarfullt baráttufólk sem berst fyrir betra samfélagi, þar sem skynsemi og sanngirni ræður ríkjum. Landsmenn þurfa nú að kjósa Samfylkinguna sem hefur hag eldri borgar og öryrkja í forgangi.

Með því að kjósa áfram Sjálfstæðisflokkinn verður áfram ójöfnuður í landinu. Loforð stjórnarflokkana til eldri borgara eru álíka nískuleg og þau hafa verið sl. 12 ár

Á Landsfundi Samfylkingarinnar ríkti gleði og baráttuvilji. Formaðurinn Ingibjörg Sólrún boðaði lausnir á fjölmörgum vandamálum. Lausnir fyrir unga og aldna . Lausnir til að útrýma biðlistum og 10% skatt á lífeyrisgreiðslur eldri borgara.

Frábært var líka að sjá á fundinum formenn í þremur Jafnaðarmannaflokkum þ.e. Danmörku, Svíðþjóð og Íslandi. Þrjár konur, boðberar nýrra tíma

Nú er lag að kjósa konu til forystu í næstu ríkisstjórn. Verum stoltar eins og þegar við kusum konu sem forseta. Ingibjörg Sólrún er mikilhæfur stjórmálamaður í frjálslyndum Jafnaðarmannaflokki.

Látum ójöfnuð tilheyra fortíðinni, lítum til framtíðar þar sem jöfnuður og velferð ríkir fyrir alla landsmenn. Það er leiðarljós Jafnaðarmanna.

Konur og karlar kjósum Samfylkinguna 12. maí.

Rebekka Jóhannesdóttir ritari/lyfjatæknir