Þýskaland og Pólland mætast í úrslitum HM

Þýskaland og Pólland leika til úrslita um heimsmeistaratitilinn í handbolta en Ísland mætir Spánverjum í leik um sjöunda sætið. Báðir undanúrslitaleikir keppninnar í gær voru tvíframlangdir. Þjóðverjar lögðu Frakka í æsispennandi leik sem þurfti að framlengja tvívegis. Eftir fyrri framlenginguna, var staðan 29-29 þar sem Florian Kehrmann náði að jafna fyrir Þjóðverja á síðustu stundu eftir að Frakkar misnotuðu tækifæri á að komast tveimur mörkum yfir.

Markvörður Þjóðverja, Henning Fritz varð þjóðhetja heimamanna þegar hann tryggði þeim sigur 3 skúndum fyrir leikslok með því að verja skot frá Daniel Narcisse. Lokatölur urðu 32-31 og 19 þúsund áhorfendur gjörsamlega trylltust á pöllunum í Kölnarena í Köln enda Þjóðverjar komnir í úrslitaleikinn þar sem þeir mæta Pólverjum.

Pólverjar lögðu Dani einnig í tvíframlengdum leik. Danir náðu yfirhöndinni þegar þeir komust yfir snemma í síðari framlengingunni, 31-30. En þeir fóru illa að ráði sínu og klaufaleg mistök gerðu að verkum að Pólverjar skoruðu þrjú mörk í röð en lokatölur urðu 36-33 fyrir Pólverja. Dönsku þjóðinni var því skyndilega kippt aftur niður á jörðina með sama meðali og þeir rifu þá íslensku niður og Danir mæta Frökkum í leik um bronsið.