Ríkisstjórnin hysji upp um sig brækurnar í fangelsismálum

Hvatt var til þess á Alþingi í morgun að fangelsismál yrðu tekin úr höndum ráðherra og að þingnefndir hefðu frumkvæði að því veita aukið fé í málaflokkinn. Var ríkisstjórnin jafnframt hvött til að hysja upp um sig brækurnar í málefnunum.

Það var Kolbrún Halldórsdóttir, þingmaður Vinstri - grænna, sem vakti athygli á þeirri stöðu sem upp er komin í fangelsismálum en um helmingur fangavarða í landinu hefur sagt upp vegna óánægju með kjör sín og aðbúnað.

Benti Kolbrún á að lengi hefði verið vitað af sleifarlaginu í fangelsismálum þar sem fjármunir hefðu ekki fengist til úrbóta. Sagði hún við þingið að sakast að hafa ekki sett meira fé í málið og hvatti ríkisstjórnina til þess að hysja upp um sig brækurnar.

Arnbjörg Sveinsdóttir, þingflokksformaður Sjálfstæðisflokksins, sagði ástandið vissulega alvarlegt en betra væri að ræða þau þegar dómsmálaráðherra væri viðstaddur. Kolbrún ætti því að biðja um utandagskrárumræðu um málið. Arnbjörg lýsti enn fremur þeirri skoðun sinni að Alþingi væri ekki vettvangur kjaraviðræðna heldur væri það í höndum stéttarfélaga og viðsemjenda þeirra að ræða launamál.

Valdimar Leó Friðriksson, þingmaður Frjálslynda flokksins, benti hins vegar á að málið snerist ekki bara um kjör heldur einnig aðbúnað. Einn fangavörður væri til dæmis á vakt á Akureyri og fréttir hefðu borist af því að fangar hefðu sloppið úr gæsluvarðhaldi þar. Það væri vegna slæms aðbúnaðar.

Steingrímur J. Sigfússon, formaður Vinstri - grænna, benti auk þess á að það þyrfti ekki alltaf ráðherra til að takast á við málin. Allsherjarnefnd og fjárlaganefnd hefðu ákveðnar skyldur og því hvetti hann þær nefndir til þess að láta málið til sín taka úr því ráðherrar stæðu sig ekki í stykkinu.

Kolbrún benti enn fremur á að fangelsismálin tengdust meðferðarmálum almennt. Fangar dveldu á sjálfstæðum meðferðarstofnunum og hefðu getað gengið þar inn og út. Slíkar stofnanir gætu ekki staðið undir sömu fagkröfum og fangelsi en leitað væri til þeirra vegna fjárskorts. Væri þetta hluti af syndrómi ríkisstjórnarinnar að svelta stofnanir ríkisins eins og Fangelsismálastofnun.