Vilja þjónustusamning milli SÁÁ og heilbrigðisráðuneytisins

Ragnar Aðalsteinsson hæstaréttarlögmaður telur að ríkið geti þurft að greiða SÁÁ tvöhundruð og sextíu milljónir vegna hallareksturs á sjúkrastofnunum félagsins árin 2006 og 2007. Ríkisendurskoðun hefur vakið athygli á því að enginn þjónustusamningur sé í gildi við samtökin og mæltist til þess í mars í fyrra að frá því yrði gengið sem allra fyrst.

Enginn þjónustusamningur hefur verið í gildi milli SÁÁ og heilbrigðisráðuneytisins þar sem deilt er um kostnað vegna sjúkrastofnana samtakanna.

Ragnar Aðalsteinsson hefur unnið lögfræðiálit fyrir samtökin þar sem kemur fram að ríkið megi ekki semja um lögbundna þjónustu fyrir ríkið þannig að halli á viðsemjendur þess. Í áliti Ragnars kemur einnig fram að ríkinu sé óheimilt samkvæmt lögum að semja við aðra um meðferð áfengis og vímuefnasjúklinga, en þá sem hafa til þess menntun og tilskilin leyfi.

Í lögfræðiálitinu kemur fram að áfengissjúklingar eigi rétt á heilbrigðisþjónustu samkvæmt lögum og íslenska ríkinu sé skylt að veita hana, ýmist með því að sinna henni sjálft eða semja við aðra um verkið.

Íslenska ríkið hefur valið síðari kostinn að mestu leyti og rekur aðeins eitt meðferðarúrræði, deild 33 A við Landspítalann þar sem dvelja að jafnaði fimmtán áfengissjúklingar og þá helst þeir sem þjást jafnhliða af geðsjúkdómum. SÁÁ hefur því að stærstum hluta annast heilbrigðisþjónustu við áfengissjúklinga, þannig að það uppfylli skilyrði laganna. Eftir því sem fjárframlög eru minni til samtakanna þeim mun minni þjónustu er hægt að veita. Fari svo að SÁÁ loki deildum sínum er ríkinu skylt samkvæmt lögum að taka við sjúklingum þaðan.

Ragnar Aðalsteinsson segir að hvorki stjórnarskráin né almenn lög heimili íslenska ríkinu að flytja hluta kostnaðar við meðferð áfengissjúklinga yfir á einkaaðila, en ríkið eigi að hafa eftirlit með einkaaðilum og fylgjast með því að gæði þjónustunnar uppfylli kröfur tímans og þekkingu.

Þórarinn Tyrfingsson yfirlæknir segir á heimasíðu SÁÁ að hallinn á Vogi sé svo mikil um þessar mundir að SÁÁ eigi aðeins tvo kosti og báða verulega slæma. Að stefna í gjaldþrot eða draga stórkostlega og tilfinnanlega úr læknis og bráðaþjónustu fyrir veikustu áfengis- og vímuefnasjúklingana.