Margrét ákveður næstu skref í dag

Margrét Sverrisdóttir ákveður á fundi í dag klukkan sex hver næstu skref hennar á vettvangi stjórnmálanna verða. Þá fundar hún með sínu nánasta samstarfsfólki úr Frjálslynda flokknum um þá stöðu sem upp er komin eftir að hún laut í lægra haldi fyrir Magnúsi Þór Hafsteinssyni í varaformannskjöri á landsfundi flokksins um helgina.

Fundurinn í dag verður lokaður en reiknað er með að hann standi í tvo tíma. Margrét vildi í samtali við fréttastofu í morgun ekkert segja til um það hvort líklegt væri að hún segði sig úr Frjálslynda flokknum en sagði það vonbrigði hvernig mál hefðu þróast.