Lögregla birtir myndir af árásarmönnum

Lögreglan á höfuðborgarsvæðinu leitar nú þriggja manna vegna mjög alvarlegrar líkamsárásar í Reykjavík á nýársnótt og hefur birt myndir af þeim úr öryggismyndavél. Þremenningarnir eru grunaðir um að hafa ráðist á tvo menn á móts við kínverska viðskiptasendiráðið í Garðastræti 4.

Báðir mennirnir misstu meðvitund og annar þeirra höfuðkúpubrotnaði og liggur á sjúkrahúsi. Lögregla segir í tilkynningu að árásin virðist hafa verið algjörlega tilefnislaus en þeir sem fyrir henni urðu misstu báðir meðvitund. Lögreglan á höfuðborgarsvæðinu biður þá sem hafa vitneskju um árásarmennina að hafa samband í síma 444-1000.