Byrgið skuldar HS hátt í 20 milljónir króna vegna Rockville

Byrgið skuldar Hitaveitu Suðurnesja enn 16 milljónir króna auk dráttarvaxta í tvö til þrjú ár frá þeim tíma þegar starfsemi þess var í Rockville á Keflavíkurflugvelli á árunum 1999-2003. Þetta kemur fram í Víkurfréttum í dag.

Þar er bent á að tugum milljóna hafi verið eytt í endurbætur á húsnæði í Rockville en því svo lokað snemma árs 2003 þegar Byrgið flutti að Efri-Brú í Grímsnesi. Haft er eftir Hjálmari Árnasyni, þingflokksformanni Framsóknarflokksins, að smám saman hafi komið í ljós að Byrgismenn hafi ekki staðið við orð sín og þar á meðal var að gera upp skuld við Hitaveitu Suðurnesja.

Hún nam 13 milljónum króna í janúar 2002 samkvæmt skýrslu utanríkisráðuneytisins en eftir þverpólitíska samstöðu fékk Byrgið 12 milljónir frá Alþingi til þess að greiða þessa skuld. Þeir fjármunir skiluðu sér aldrei til hitaveitunnar eftir því sem segir í Víkurfréttum.

Haft er er eftir Júlíusi Jónssyni, forstjóra hitaveitunnar, að í september 2002 hafi ógreidd orkunotkun og tengigjöld verið að upphæð tæplega 16 milljónir króna auk dráttarvaxta í 2 - 3 ár og sú skuld sé enn útistandandi.