Vegfarandi varð fyrir bílhurð

Lögregla á Ísafirði rannsakar nú mál sem upp kom í gær en þá varð gangandi vegfarandi fyrir hurð á bifreið sem var ekið fram hjá honum á Skutulsfjarðarbraut. Eftir því sem fram kemur í frétt frá lögreglunni meiddist vegfarandinn ekki alvarlega en bifreiðinni var ekið á brott eftir atvikið.

Lögregla hafði þó uppi á henni skömmu síðar og kannaðist ökumaður við að farþegi í bifreið hans hefði opnað hurðina en neitaði að gefa upp hver það hafi verið. Sýnilegar skemmdir urðu á bílhurðinni sem vegfarandinn varð fyrir.