Dramatískur Valssigur í Vesturbæ

Valsmenn tryggðu sér sæti í 8-liða úrslitum VISA-bikars karla eftir dramatískan sigur á KR-ingum í Vesturbænum. Vítaspyrnukeppni þurfti til að knýja fram úrslit en þar fóru heimamenn illa af ráði sínu. KR-ingar brenndu úr þremur vítaspyrnum á meðan Valsmenn skoruðu úr öllum sínum.

Segja má að réttlætinu hafi verið fullnægt með sigri Vals í vítaspyrnukeppninni í gær. Liðið var í bílstjórasætinu allt fram á síðustu mínútu venjulegs leiktíma í gær þegar varnarjaxlinn Tryggvi Bjarnason skoraði með skalla eftir aukaspyrnu markvarðarins Stefáns Loga Magnússonar frá miðju vallarins.

Guðmundur Benediktsson hafði áður komið þeim yfir á 73. mínútu úr aukaspyrnu sem lak í gegn vörn KR en fram að þeim tíma hafði Stefán Logi komið í veg fyrir að Valsmenn næðu að skora. KR-ingar vörðust auk þess fimlega lengst af, með „nýju miðverðina" Tryggva Bjarnason og Ágúst Gylfason sem bestu menn. Sóknarleikur af hálfu KR var hins vegar varla til staðar.

Teitur Þórðarson beitti sömu taktík og í síðustu leikjum KR og notaðist við 4-5-1 leikkerfið þar sem Rúnar Kristinsson var í frjálsri stöðu fremst á miðjunni. Rúnar er hins vegar ekki að finna sig í röndóttu treyjunni og um leið og jafn mikilvægur leikmaður er ekki inn í leiknum missir sóknarleikur KR algjörlega marks.

Valsmenn spiluðu eins og þeir eru vanir lengst af í gær, leikmenn eru mjög hreyfanlegir og ná oft á tíðum að spila boltanum vel á milli sín. Baldur Aðalsteinsson og Birkir Már Sævarsson áttu mjög góðan leik á hægri vængnum í liði Vals og Guðmundur sýndi fína takta inn á milli. Liðið spilaði vel úti á velli en einhverra hluta vegna náði liðið ekki að binda endahnútinn á sóknir sínar. Munaði þar mestu um framlag Helga, sem var mun minna en verið hefur í sumar.

Teitur verður seint sakaður um að reyna ekki að finna réttu blönduna í liði KR. Hann kvikar hvergi við að gefa ungu mönnunum tækifæri en í gær réðu þeir einfaldlega ekki við hlutverkið. Leikur KR gjörbreyttist til hins betra eftir að Teitur setti Jóhann Þórhallsson, Björgólfur Takefusa og Óskar Örn Hauksson inn á. Mark Tryggva færði liðinu aukin meðbyr í framlenginguna á meðan leikmönnum Vals var augljóslega brugðið og voru KR-ingar síst lakari aðilinn í framlengingunni. Liðið náði hins vegar ekki að nýta sér meðbyrinn til fullnustu.

Litlu mátti muna að Valsmenn yrðu fórnarlömb eigin einbeitingarleysis í gær. Liðið hafði tögl og haldir á leiknum nánast frá upphafi. Liðið sýndi hins vegar mikinn karakter í vítaspyrnukeppninni með því að skora úr öllum sínum spyrnum fyrir framan Frostaskjólið. KR-ingar guggnuðu hins vegar á pressunni.



Vítakeppnin

1-0 Helgi Sigurðssonskoraði

1-0 Björgólfur Takefusavarið

2-0 Sigurbjörn Hreiðarssonskoraði

2-0 Ágúst Gylfasonskaut yfir

3-0 Daníel Hjaltasonskoraði

3-0 Jóhann Þórhallssonvarið