Gleðilegan dag umhverfisins

Dagur umhverfisins er nú haldinn hátíðlegur í níunda sinn á fæðingardegi Sveins Pálssonar, fyrsta náttúrufræðings Íslands.

Að þessu sinni er dagurinn tileinkaður hreinni orku og loftslagsbreytingum. Loftslagsbreytingar af manna völdum eru eitt mikilvægasta viðfangsefni mannkyns á þessari öld. Íslensk stjórnvöld gera sér grein fyrir þessu og hafa lagt fram metnaðarfulla áætlun um að minnka losun gróðurhúsalofttegunda um 50-70% til ársins 2050. Markmiðinu á að ná með samdrætti í notkun jarðefnaeldsneytis, aukinni nýtingu endurnýjanlegrar orku og loftslagsvæns eldsneytis og aukinni bindingu kolefnis með skógrækt og landgræðslu.

Ríkisstjórnin hefur þegar gripið til ýmissa ráða til að draga úr losun gróðurhúsalofttegunda. Hún hefur hvatt til aukinnar notkunar á vistvænum ökutækjum, meðal annars með því að fella niður vörugjöld af metan-bílum og rafmagnsbílum og veita afslátt af vörugjöldum á tvíorkubílum. Þá hefur verið mælst til þess að ríkisstofnanir kaupi vistvæna bíla þegar þær endurnýja bílakost sinn.

Markmiðið er að í lok árs 2012 verði 35% af bílum í eigu ríkisins knúin vistvænum orkugjöfum. Lög hafa verið sett sem koma í veg fyrir að losun gróðurhúsalofttegunda frá stóriðju fari yfir þau mörk sem kveður á um í Kyoto-sáttmálanum, landgræðslu- og skógræktarverkefni hafa verið efld og fyrir aðeins nokkrum dögum tilkynnti ríkisstjórnin að akstur allra bifreiða stjórnarráðsins yrði kolefnisjafnaður og að hið sama yrði gert vegna flugferða ríkisstarfsmanna innanlands og erlendis, frá og með næstu áramótum.

Mikilvægur þáttur í loftslagsstefnu stjórnvalda er vinna að fræðsluverkefnum í samvinnu við frjáls félagasamtök til að upplýsa almenning um gróðurhúsaáhrif og aðgerðir til að draga úr þeim. Liður í þessari stefnu er útgáfa fræðsluritsins Skref fyrir skref sem gefið verður út í dag. Ritið er samstarfsverkefni umhverfisráðuneytisins og Landverndar og því er ætlað að fræða okkur um hvað hvert og eitt okkar getur gert til að skapa vistvænni heim.

Ýmsir hafa boðað til viðburða í tilefni Dags umhverfisins. Upplýsingar um þá má nálgast á vef umhverfisráðuneytisins, www.umhverfisraduneyti.is.

Höfundur er umhverfisráðherra.