Bjarni tekur við Stjörnunni

Bjarni Jóhannsson hefur verið ráðinn þjálfari 1. deildarliðs Stjörnunnar í Garðabæ. Hann skrifaði undir þriggja ára samning við félagið í hádeginu í dag samkvæmt fréttatilkynningu frá Garðabæjarliðinu.

Bjarni tekur við liðinu af Lárusi Guðmundssyni sem stýrði liðinu í sumar. Bjarni er menntaður íþróttakennari og hefur auk þess tekið öll þau knattspyrnuþjálfarapróf sem í boði eru.

Hann hefur áratuga reynslu sem knattspyrnuþjálfari og hefur m.a. þjálfað ÍBV, Fylki, Grindavík og Breiðablik. Þá er Bjarni aðstoðarþjálfari Eyjólfs Sverrissonar við A landslið karla.

Í tilkynningunni segir að stefna Stjörnunnar sé sett á sæti í Landsbankadeildinni að ári, en Stjarnan lék síðast í efstu deild árið 2000.