Vaxandi álútflutningur stuðlar að auknum stöðugleika

Ný ríkisstjórn hefur tekið við völdum og einsett sér að koma á jafnvægi í þjóðarbúskapnum. Viðtækt jafnvægi á sem flestum sviðum er best til þess fallið að tryggja langvarandi hagvöxt og viðunandi starfsskilyrði fyrirtækja en um leið kaupmátt launafólks.

Af einhverjum ástæðum vilja sumir skrifa það ójafnvægi, sem hér ríkir, á reikning ál- og orku­iðnaðar. Það á ekki við haldbær rök að styðjast. Þar vega aðrir þættir þyngra, aðallega breytingar á fasteignamarkaði, vaxandi einkaneysla, mikil samneysla og lækkun skatta.

Vissulega hafa byggingaframkvæmdir við ál- og orkuver í för með sér viðskiptahalla meðan á þeim stendur þar sem flytja þarf inn mikið af fjárfestingarvörum. Sá halli er hins vegar ekki vandamál þegar horft er til þess að árlega mun áliðnaðurinn flytja út verðmæti fyrir hundruð milljarða næstu áratugina. Sá útflutningur hefur jákvæð áhrif á viðskiptajöfnuð. Í þessu sambandi er oft talað um góðkynja viðskiptahalla þegar hann stafar af uppbyggingu nýrra útflutningsfyrirtækja.

Árið 2006 var ál flutt út fyrir ríflega 61 milljarð króna. Reiknað er með að útflutningurinn aukist um 75% á þessu ári og um 50% á því næsta og verði þá um 143 milljarðar. Þessi aukning er vegna stækkunar Norðuráls á Grundartanga og starfsemi Alcoa Fjarðaáls. Í fyrra nam álútflutningur 23,5% af heildarverðmæti vöruútflutnings en hlutfallið mun hækka í 35% á þessu ári og 41% á því næsta.

Vegna vaxandi vægis álútflutnings breikkar útflutningsgrunnur þjóðarbúsins og hvílir á fleiri sterkari stoðum en áður. Sá tímabundni viðskiptahalli, sem skapast vegna uppbyggingar ál- og orkuiðnaðar, er því síður en svo vandamál. Þvert á móti mun aukinn álútflutningur stuðla að betra jafnvægi í þjóðarbúskapnum og vinna þannig með efnahagsmarkmiðum nýrrar ríkisstjórnar.

Höfundur er hagfræðingur Samtaka iðnaðarins.