Yfirheyrslum yfir feðgunum Niels H. Mortesen og Hans Mortensen, framkvæmdastjórum færseyska fyrirtækisins SMS, í Baugsmálinu lauk nú fyrir hádegi en þeir voru spurðir um samskipti SMS og Baugs í tengslum við 16. ákærulið Baugsmálsins.
Hann snýr að meintri rangfærslu bókhalds Baugs en Jóni Ásgeir Jóhannessyni, forstjóra Baugs, og Tryggva Jónssyni, fyrrverandi aðstoðarforstjóra Baugs, er gefið að sök að hafa látið færa kredityfirlýsingu frá SMS upp á rúmar 46 milljónir króna inn í bókhald Baugs án þess að hún ætti sér stoð í viðskiptum þessara aðila. Baugur átti á þessum tíma helmingshlut í SMS.
Í yfirlýsingunni er talað um markaðsstuðning til Bónuss upp á 3,9 milljónir danskra króna frá Dagrofa sem er danskur heildsali sem SMS átti viðskipti við. Hafa sakborningar bent á að þetta tengdist fyrirhuguðum kaffiviðskiptum í gegnum SMS sem ekki hafi gengið eftir og því verið leiðrétt.
Fram kom í máli Hans Mortensen í morgun að Tryggvi Jónsson hefði beðið um að þessi kredityfirlýsing yrði gefin út í ágústmánuði 2001 og að texti hennar hefði komið frá Tryggva. Kredityfirlýsingin var hins vegar færð inn í bókhald Baugs í lok júní sama ár. Fram kom í máli feðganna að Tryggvi hefði gefið þá skýringu á kredityfirlýsingunni að hana ætti að nota sem innanhússkjal hjá Baugi. Kredityfirlýsingin hefði ekki verið færð í bókhald SMS.
Þá sögðu feðgarnir báðir að engin viðskipti milli SMS og Baugs hefðu legið að baki yfirlýsingunni. Hins vegar hefði verið rætt um sameiginleg innkaup Baugs eða Aðfanga og SMS á ýmsum vörum og að SMS hefði fengið markaðsstyrki eða bónusa frá Dagrofa fyrir viðskipti á hverju ári. Sagði Niels enn fremur að á tímabili hefðu Aðföng, félag Baugs, keypt kaffi í gegnum SMS af danska félaginu Kraft. Hann mundi hins vegar ekki hvaða ár þau viðskipti hefðu farið fram. Hann hefði jafnframt rætt við Lárus Óskarsson hjá Aðföngum um frekari kaffiviðskipti við Kraft en ekki hefði orðið af því þar sem Aðföng hefðu fengið betra verð á kaffi hér heima.
Feðgarnir voru einnig spurðir út yfirheyrslur hjá færeysku lögreglunni dagana 10. og 11. september 2002 vegna málsins en fyrri daginn breytti Niels framburði sínum í miðri yfirheyrslu og sagði Tryggva Jónsson hafa óskað eftir tilhæfulausum kreditreikningi að upphæð 3,9 milljónir danskra króna.
Fyrir dómi í morgun sagði Niels að hann hefði breytt framburði sínum vegna þess að hann hefði upphafi verið að geta sér þess til hvað lægi að baki ósk Tryggva um kredittyfirlýsinguna. Þá sagðist hann ekki minnast þess að orðið tilhæfulaus hefði verið notað í yfirheyrslunum og að hann skildi ekki þetta íslenska orð.
Báðir neituðu feðgarnir að skrifa undir yfirheyrsluskýrslur í málinu. Fram kom í máli Niels að hann hefði ekki skrifað undir skýrslu við yfirheyrslur seinni daginn en hann hefði ekki gert athugasemdir við það sem þar kom fram. Hugsanlega hefði lögmaður hans ráðið honum frá því að skrifa undir skýrsluna. Hans Mortensen sagðist hins vegar ekki hafa ritað undir skýrslu lögreglu fyrri daginn þar sem öfgakenndar kringumstæður hefðu verið við yfirheyrsluna eins og hann orðaði það. Hann hefði hins vegar ekki gert athugasemdir við það sem skrifað var.
Nú eftir hádegið halda áfram skýrslutökur af færeyskum vitnum, þar á meðal lögreglumönnum sem önnuðust yfirheyrslurnar yfir feðgunum. Á morgun koma svo meðal annars lögreglumenn sem önnuðust rannsókn Baugsmálsins hér á landi, þar á meðal Arnar Jensson og Jón H.B. Snorrason, fyrrverandi yfirmaður efnahagsbrotadeildar Ríkislögreglustjóra. Auk þeirra kemur Jónína Benediktsdóttir einnig fyrir dóminn á morgun.
