Tileinkum Ásgeiri sigurinn

Eiður Smári Guðjohnsen sagði að sigur Íslands á Norður-Írlandi í gær hafi verið tileinkaður Ásgeiri Elíassyni sem lést á sunnudaginn síðastliðinn. Landsliðsmennirnir báru sorgarband af því tilefni í leiknum í gær.

„Við erum allir sammála um að tileinka Ásgeiri sigurinn og viljum við votta fjölskyldu hans samúð okkar. Við erum nokkrir í hópnum sem höfum spilað undir hans stjórn en missirinn er ekki einungis mikill fyrir knattspyrnuheiminn heldur var hann líka frábær persóna sem er mikið saknað.“

Eiður hefur átt við meiðsli að stríða undanfarna mánuði. „Það er meiriháttar fínt að vera kominn aftur í fótbolta og er ég ánægður með að hafa spilað þessar 35 mínútur í leiknum. Leikurinn var þó ekkert æðislegur. Við buðum hættunni heim í síðari hálfleik en misstum aldrei trúna og uppskárum sigur. Miðað við spilamennsku okkar áttum við hann kannski ekki skilinn en miðað við þá vinnu sem við höfum lagt í þessa tvo leiki áttum við þrjú stig fyllilega skilin.“

Grétar Rafn Steinsson átti þátt í báðum mörkum íslenska liðsins. „Það er búin að vera mikil jákvæðni í kringum liðið frá Kanadaleiknum og það er búinn að vera stígandi í þessu hjá okkur. Það er mun skemmtilegra að fara inn á völlinn og vera á Íslandi þegar jákvæðni er en ekki neikvæðni. Það getur verið niðurdrepandi að koma heima og fá skít og skömm þrátt fyrir að vera að leggja sig fram og berjast,” sagði Grétar.

„Nú er allt annað að koma heim og það kemur fyrir vikið auka neisti í menn og þeir eru virkilega tilbúnir að sýna það og sanna fyrir þjóðinni að þeir séu að leggja sig fram. Það gekk allt upp í þessum tveimur leikjum og leiðinlegt að við höfum ekki unnið Spánverjana því við áttum það skilið. Í heildina litið eru þetta mjög góð úrslit fyrir okkur sérstaklega þegar við lítum til baka og sjáum hversu lélegt þetta hefur verið,” sagði Grétar Rafn sem var ekki hrifinn af norður-írska liðinu.

„Svona lið á ekki að fara á stórmót. Við erum búnir að taka sex stig af þeim og það lið sem við tökum sex stig af á ekki að fara á stórmót,” segir Grétar Rafn sem lítur bjartsýnn fram á veginn. „Við verðum að halda okkur áfram á jörðinni en það er frábært að áhorfendur og fjölmiðlar skuli þjappa sér að baki okkur og hjálpa okkur,” sagði Grétar.